Singapore Background

Ni 15 May, 2011 dar 12:00 pm atangin JB MCF Secretary Pu Lalthankimia'n Johor Bahru khaw chhunga hmun pawimawh lai leh Malaysia leh Singapore ram pahnih inkalpawhna leidawh ropui tak maite chu Taxi-in min fanpui a. He kan thlalak hi JB lam atanga Singapore ram background-a lak a ni a. A khawthleng leh hmun leh hma invalh vel dan te chuan lung a ti leng ang reng hle mai. JB-a Immigration Headquarters pawh a pawn lam atangin kan va thlir a. A building pianhmang chu indo thlawhtheihna thlawk tur ang mai hi ni berin a lang.

MCF JB Worship

May 15, 2011 Johor Bahru Baptist Church (JBBC)-a lawi MCF Pathian biak inkhawm bana group thlalak a ni a. Pastor leh Pastor nu (Pi Dengthangi) bial an va fan tum hian Lalpa Zanriah Sacrament an sem. JBBC hian MCF memberte inkhawm kal/hawng transport man a tumsak vek a. Atirah chuan Van motor-in a va hruai a, a thlah leh thin a, inkhawm pawh kan thahnem duh khawp mai a. Mahse, kan Van hman kha sikul Van a ni a, a hman ta tlat lo mai a, MCF memberten mahni sumin Taxi remchang ran rawn la a, receipt an dil a, inkhawm banah MCF Treasurer-in a pe ve leh a, MCF hotute chuan thla tawpah JBBC-ah an bil ve leh ta thin a ni. Tawng lama harsatna avangin Taxi han lak mai hi a awl lo va, inkhawm kan kiam phah thin. Pathian biakho inkhawm a nuam a, kan hlim hle thin a ni.

WEDDING RECEPTION OF THAN OO and ZARTEI

Than Oo, Magwe, leh Zarzoliani, Tahan, te chu April 17, 2011 7:00 pm Kuala Lumpur Baptist Church, Shalom Hall-ah Kristian Dan thianghlimin Rev. Gospel Hrilvelthanga kut hmangin an innei. Serh leh sang lam kan zawhah an hnathawhna restoranah a lawmna buatsaih a ni a. Hman lai bus hlui ung ve tawh tak hian min thiar a. Inneih lawmna zanriah tuihnai tak hnianghnar takin kan kilho. He dawhkan kiltute hi Pu Hualsailova, Pi Mi Mi, Pi Laldinthari leh a fapa Samuel Zonunsanga, Sayama Dengthangi (Pastor nu) leh Pastor te an ni. Mo thar Zartei'n ei tur a rawn dah lai a ni. Kan tlai-puar-hlimtlang hle.

HLUI ZUN NGAI ZALENNA

Tumbuk khaw daia Tuifinriat

Hei hi thil ni thei leh mawi hnai ve tak han chin zui chi ni hian keimahah chuan a thawk hlawl lo.  Mawi tih chu sawi loh, mihringte tan a tangkaina tur kawng pakhat mah ka hmu thlawt bawk lo. Ka tih atan ka duh loh ang bawkin thiante hman atan ka duhsak hauh lo bawk. Ka ruih bosan emaw ka hlamchhiah ve hrim hrimah thlirtuten ngai mah se, han pawmzam mai turin a kal hmang leh a tihdan zia hian mi hip lo tawp, dik taka inphawrh chuan ka ngaina thei mawlh lo a ni ber mai. Amah ngaina tur leh pawm thiam ve mai tura min duhsaktu thiante ka hmaizah em avang zawkin, thinlung duhna tel hauh lovin ka han hnim hnai dawn chhin a, a teuh lo mai, ka Mizo tlawmngaihna pawh hian a tlin lo i han ti deuh charh mai teh ang. Taitesena emaw Vanapa te pawh ni se, ka Mizo rilru atanga ka han thlirsak hian, he thil kalhmang kher kherah hi chuan tlawmngai No Pui an dawng pha bik hauh lo vang.

                Ka hriat tirh phei kha chuan kuhva tui, patling ka chhunga leng tawh lo, Biak In bang mawi emaw bawlhhlawh bawm emaw a nih ngaihtuah chang lova han phuh darh khum chuai chuai mai hi ka nap a. Hei kher hi chu thianten min lo hmelhriattir hman hi pawi ka titawp thei lo va, nalh leh mawi ka ti bawk lo. Min sih hmuhtute han dem a mawi loh avangin ngawih liam mai ka’n tum pawh hian a rem ngang lo a ni. Heti khawpa ka lo engto va, ka duh loh chhan erawh han sawi fak tur hre chuang hauh si lo hian ka tei thei lul lo hi a ni ta ber mai a. He thil chungchanga ka rilru put hmang thianten an han hriatchian meuh chuan min kawhhmuhtu an nih kha pawi an tihnuhnawh leh a, a sawt tawh chuang si lo.

                A dik ka ti, ka tan chhan hi. He thil ka tih loh avang hian hna thawk peih lo mi vakrawlai ka nih bikna ka hre hauh lo.  Chunga thuneitute rahbeh leh hlawh pek kim loh vang pawh ni hran lo va, eng hna pawh nghet tak leh ziktluak taka thawk hman lo khawpa “hna-leh-lan-sam” chu ka ni bik lo tih ka inhria. Min duhsaktute aw-ka ngai pawimawh zo lova ni ka vui liam tum erawh chhiar tham awm ve mah se, mahni chil tiphuan tawk leh tawng titui tawk inhnangfakna tur chu ka thlantui hian a lei pha ve hrim hrim. Chu mi kawngah chuan mite meizial ban kual dun dun nih ka hlauh ber a ni bawk a, ka kuta zial tit-ek kai khawp chuan thianghlimna ka tlachham bikin ka inhre lo.

Mite min hmuh dan chu thu hran ni se, ka inhmuh danah ka induh tawk a. Miten ti mah se ka tih atan ka duh lova ka zui lo a ni mai alawm, tu pawi nge ka khawih? He thil hian tlangval piantha, tluantling, hmel tha tak pawh a tikhawr tut a, nula pian mawi sa pan thlerh thlawrh pawh hian a inhmeh chuang lo. He thil han hman mai tur hi ka zei lo ru riau va, ka thiam lo mai ni lovin han hman ve chhin eih pawh ka inthlahrung. Thianten tlangnel tak maia an han hman zaih zaih pawh hian ka lo awm thiam lo va, a mawi lohna mai ni lovin a awmzia nena inkawlkalhna te ka ngaihtuah chhuak bawk. Ka pian leh seilenna ramin a zir loh vang nge ni dawn, han tih ve chang pawh hian a bul tawi tut a, ka sawi tum leh kawhhmuh tum pawh thleng zo ta lovin ka hria a. Inralring tak maiin ka han khai chho a, tihthanna hian min tihzei beiseiin, ka han phawrh chhuak ve ngei mai a, a va’n remchang lo tak ngai em aw! Mahni tih ngai loh thil, mite tana thil tlanglawn tak leh hman nuam tak tih ve tul ta tlat mai hi zawng Chhurbura’n Hmawng kunga chaw chhum a tum ai khan harsa fe-in ka ngai zawk.

Kan ram leh ram thumnaa ka hman leh tawh loh tur tih thiam lo tum vak vak hian zan mang chhia a tisei thlawn mai mai tiin tih loh ka’n tum thin a, tuna kan chenna ram tihdan phung a nih tlat avangin ka hman ve loh chuan mi dangdai nih ka hlawh thei bawk si a. Hringnun hlutna tinep thei emaw Kristian nihna pawtpeh zawnga mite tih dan tha lo buanthluk theih hian kan inphal ngai lo. Thenrual inhmuh khàt chàm lawm nân Biar (beer) han tlak pap pap mai te, thiante hmaizah avang ngawt a, mahni duhthlanna hralh duh mi chu ni lovin ka inhre thin a, mahse ka chiang ngam chiah lo. Amaherawhchu tun lai mite tih dan alawm ti ve pawlh ringawt a, nulat tlangvalna hmang duhdahtu leh biar rim nam tihreh nan zu tui chiah zawr vaihlova pawlh kuhva khawr hmuam tun chunga Pathian biak inkhawm leh kohhran thiltih pelh duh hauh lote zingah erawh chuan ka thihni thleng pawhin chhiar telin ka awm hauh lo vang. Kawr var ka hak laia thinlung ngaihtuahna bal dum tluk, mite hmuh theih si loh chiang taka hmutu leh hretu hmaah, sual thupha chawi tur neih inhre ngai lo khawpa chapo birute zingah chhiar tel nih ka hlau ber a. Thiam ve thawkhat leh hre ve tawka inngaihna vilikin mi dangte chaldelh rantu nih phei zawng ka thisen hian ngam lul lo se tih ka ngiahtuah laia kawlphe aia chak, mahni induhtawkna leh chapona thinlung fahrah lutuk a lo thlawh phei zuai lai khan, thinlung hretu thil hriat theihzia hi mak chu ka ti; ngaihtuahna far khat leh rilru suangtuahna si per khat chauh pawh hi Ani chuan a hmuh thelh ngai si lo. “Tun lai mite tih dan alawm” tih hi mahni tisa duhzawng tih theihna chhuanlam laisen atan, sual ngaihzamna kamchhe tleuh nana hmang zeitute pawh hian, engkim Hretu leh Hmutu hmaah chuan kan la inpuang dawn tih kan hai mawlh si lo. Hmasawnna kawng tipingtu ngaih dan hlui leh tih dan phung tangkai tawh lohvina a sal-beh ka lo la ni ta cheu a niang chu, ka thianten “Hlui-ngaia” emaw “Hluizunthanga” ti tea min koh tak hi. Pawi ka ti chuang lo, ka tuar thiam tho. Mahse, chutiangin “tih dan hlui”zunzama phuarbeh ka nih reng ka lo inhre ngai lo. Hei hi ka chhahna lai tak pawh a ni ta ve ang.   Mahse chutianga zung kaih nei lo, buh si thli len bo ang maiin khawsak ka zuam bawk lo.

Tuna ka harsatna chu thil tha, mite chin than thil pawimawh, mahni lo tihthan ve loh,mawi pawh ka tih lem loh han hman hi a ni ber mai a. Mahni hnam nunphung leh sakhaw inrelbawl danah a tel tlat loh avangin leh kan seilenna hmun rama kan lo hman than tlat loh avang khan chu thil chu han hmang chhin tur pawhin “kan tihdan a ni lo” tihna rilru a lo zi chhuak a, chu chuan he thil thar hi mi laktir ngam lo leh thin. A hmanna hmuna awm si a, hmang ve thei lo han nih chu piansualna chi khat a nih miau avangin zawi zawiin, mite hriat vak lohvin ka han hmang tan ve ta a. Ni leh thla a inher rualin, ka lo hmang thiam tan ve ta a, tha lo mawi lo ka tihna rilru kha che te tein a kiam tial tial a. Ka zei ve tulh tulh a. Mizo lanu val rualte mawina leh hmelthatna timawi zualtu a lo ni zawk tih ka hmu chhuak ta zel a. A tira “kan tihdan a ni lo” tih nunphung hlui kulh bang chu zawi zawiin a chim riai riai a, danglamna leh thil pawimawh inthlakthlengna nun thar chu vartian ni eng zung mawi tak rualin hringnunah a rawn zam lut del del ta a. Hmasawnna khawvel thara chuangkai ve tur hian tih dan hlui, ngaih dan leh pawm dan hmasa zawk lak ata harsa ti taka kan tal chhuah a lo ngai reng mai a, hei hi hmasawnnaa piantharna nun dik lo zik chhuahna chu a ni tih ka hmu chhuak ta bawk a.

Khatih laia tih dan thar tha min kawhmuhtu ka thiante dem dawn dawna rilru ka lo put te khan mi tizak khawtlai a. Mahse, tunah chuan ka zak duh ta lem lo, he chin dan thar hi ngaihngam takin ka hmang ve thiam ta a, rual ka pawl ve ta bawk. Tin fuh loh leh kawk fuh lo anga ka lo inngaih thin kha thil kawh nan kut zungchal ka lo hman than vang chauh zawk a lo ni a. Kawk kualtu atan kut zungpui han hman hian nghet leh fuk takin a lo kawk fuh zaw mah a, zungchala kawh ai chuan a vin lo deuh bawk a, kawh sual palh changin han sut leh zauh pawh a awlsam zawk bawk lawm ni ka’n ti deuh ta duah a ni e. Tunah chuan thil kawh nan kut zungpui hi ka hmang thiam ve ta hle mai.