THIL PAWIMAWH CHI HNIH

Genting Highland, Malaysia

Kum zabi 21-a Mizote hi (1) retheihna leh (2) Rahbehna avangin ram tha leh ram zalen zawkah thlang kan tla mek a. Kan chenna hmun ram azirin "Kan lenna vangkhua" tia koh theih ram kan nei ta nual mai. Thenkhat tan India rama Mizoram state te, mi dang tan Myanmar rama Kabaw leh Kalay phaikuam te hi an lenna vangkhua a nih laiin, Malaysia ram, thinglera Sava fu ang mai chauhva kan khawsak lawkna ngei pawh hi kan lenna vangkhua tia koh theih ram chu a lo ni ta zel a. Khawthlang rama zuk thlangtla tawhte tan tuna an chenna khu an vangkhua a ni nghet ta bawk a.

Kawlram atangin thlangtla lo, chambang engemaw zat kan awm ang. Chutiang bawkin Malaysia rama piang kan tu leh fa, Ram thumnaa thlangtla lo, emaw thlang zuk tlaa lo kir leh emaw Myanmar rama kir leh ta chuang lo, Malaysia rama cheng hlen turte pawh kan la awm ngei bawk dawn a ni. Chung mite tan Malaysia hi an vangkhua a ni ang. Tichuan Mizote chu khawvel ram hmun hrang hrangah a ram mi niin kan khawsa tawh ang.

      Chung vangkhuaah te chuan thian thar leh bovuak thar, thenawm thar kan lo ang a, kan vangkhaw thar thenkhatah chuan a ram mite tawng zir chawpin hringnun kan din thar chho dawn a ni. Baibah leh khawr takin kan khawsa chho nawk nawk ang a, thiam lo leh zir pah zelin nun dan thar huangchhungah kan leng pheleng darh darh thin ngei ang. Mahse, chu chu tan kan takan dintu, min chotu rahbi an ni tih kan hriatreng a, tha thlah hauh lo leh fuat nei taka hma kan lak zel chuan kum rei lo teah kan vangkhaw thara vangkhaw duhawm leh hmasawnna siamtu leh tichangkangtu hnam pawimawh tak kan ni chho mai dawn a ni.

      Amaherawhchu thil pahnih kan nuna bei tlat tur a awm: (1) Mizo hnama kan chian, a, kan rinawm leh (2) Krista Isuaa kan chian a, kan rinawm hi a pawimawh chungchuang a ni. Mahni hnama kan rinawm loh chuan kan vangkhaw thara hnam changkang zawkte lem zawhin kan awm ang. Khawvel hmasawnna rahbi thar min chhehsaktu Krista Isuaa kan chian lohva kan rinawm loh phawt chuan sakhaw dang chilh behin kan awm bawk dawn a ni. Chuvangin, khawi hmunah pawh awm ila MIZO KAN NIHNA leh KRISTA ZUITU kan nihna hi khawvel mite hmuhah kan tarlan a tul em em  a ni.

      He tukverh atang hian tun laia kan Mizote nun hi i han thlir teh ang hmiang. Kan sawi tak thil chi hnihah khan kan chiang tawkin kan rinawm tawk em? Heng thil pahniha chiang leh rinawm lo kan awm nual tawh em? Engtin nge hma kan lak ang?