VARTIAN TAWNMANG

Mihring taksa leh rilru hahchawlh hun zan duhawm tak chu ei bar zawn tulnain a nawr liam leh dawn ta ruai mai a, hah hian chawlh theih hun dar kar chu thlahlel takin a thlir a, bangtar sana leh kutbun sana ten lungrual leh pawi tihpui takin an lo chekpui tlawk tlawk a. Zan thimin eng zung lo zi chhuak tur chibai buk paha a mangtha lai chuan sirva lengte pawn an mumang thawhsanin ni thar lo inher chhuak mek chu zaiin an lo lawm a, an lo awi a. Aw, an zai rite chu a va mawi tak em! A chang chuan an awrawl chu a hlim a, a chang chuan a lungngai emaw tih tur hian a dul bawk a. Zan chawlh hun pawha chawl hman lo, ni khat tla chhungkham ei bar tur zawnga hmanhlel hringfate dinhmun dur tak chu an khawngaih emaw tih tur hian sirva lengte vartian zai ri chu a dul a, an awrawl te chu hnukulh aw tliak riin a tuam a.

Engpawhnise, engin thim a hnawh bo hma vartianah zan mang hlimawm tak tak tawng hman tawh dawn loh mah se, hrisel nan a pawimawh em avang leh hahchawlh hun a neih chhun a nih avangin a room zim teah a'n zal a. An chhungkaw inrelbawl nana a hringnun hmachhawp a lo ruahman rilrukte chu beiseina nungin a tivul zel a, a muthilh hlan hian chung a beiseinaten an tinsan loh nan mumangah hmuh chhunzawm a, chelh beh tlat a duh a. Theih ni se, zan mumang leh vartian tawnmangte hian hun lo la inher chhuak zel tura a hringnun kulhbang lungremna tura a lo duan lawksa, taihmakna behchhana hlawhtlinna run nuam te chu mangphan phal se tih hi a duh aisam a ni a. Mahse, a ni thei meuh ang em?

Thawm ri-va a tam tan a, Vartian tawnmang man hun a tawi ngei ang. Zan khaw thim a liam rual deuh thawa vartian tawnmang hian beiseina nung min hmuhtir hram se tih a beisei. Zofate khawvela kan nunphung, sakhua leh philosophy te hian beiseina vartian a nei ngei a, chu chu hmuh thuai tumin a thlir thin. Chung beiseinate chu thlasik mumang ang maia a liam ral mai loh nan Zofate beiseina Siamtu chung Pathian chakna leh hmangaihnaah zungkaih thar leh a ngai a ni. 

Vartianah mang kan neiha chu chu vartian tawnmang a nih chuan chu tal chu kawng tinrenga Zofate hmasawnna leh changkannaa hlangkaitu tawnmang duhawm leh nghet ni thei mawlh se.